ពលរដ្ឋចោទក្រុមហ៊ុនវៀតណាមលួចកាប់ឈើនៅតំបន់ព្រៃឡង់.
សង្ខេប៖
“កាលពីដើមសប្ដាហ៍នេះ ក្រុមសហគមន៍បានចុះឃ្លាំមើលសកម្មភាពលួចកាប់ឈើនៅក្នុងព្រៃឡង់់ជាប់ភូមិសាស្ត្រខេត្តកំពង់ធំ សង្កេតឃើញមានសកម្មភាពអាររំលំឈើមួល នៅក្នុងព្រៃចំណុចអូរជាំវិល អូរឆ្នូ និងអូរច្រោក នៅចម្ងាយប្រមាណ ៣គីឡូម៉ែត្រពីតំបន់ដីសម្បទានរបស់ក្រុមហ៊ុនសម្បទាន ស៊ីអរស៊ីខេ ។” យោងតាមលោក ហឿន សុភាព(សមាជិកបណ្ដាញព្រៃឡង់ខេត្តកំពង់ធំ)។
លោកបន្តថា ឈើដែលគេអាររំលំរួចហើយ ត្រូវបានរថយន្តអមដោយក្រុមប្រដាប់អាវុធជាអ្នកការពារដឹកជញ្ជូនឈើនោះ នៅវេលាយប់ចូលរោងអារឈើមួយ ដែលមានទីតាំងនៅក្នុងបរិវេណក្រុមហ៊ុនសម្បទាន ស៊ីអរស៊ីខេ ហើយអារច្រៀកដឹកជញ្ជូនចេញតាមផ្លូវមកស្រុកសណ្ដាន់ ឆ្ពោះមកខេត្តកំពង់ធំ ៖ “គេដឹកឡានអារ៉េវ ហើយក្នុងនោះមានមួយក្រុមគេមានគ្នាបី បួន ប្រាំនាក់ មានកាំភ្លើងពីរដើម។ បាទគេកាប់ក្រៅព្រៃសម្បទាន ហើយគេដឹកចូលស៊ីអរស៊ីខេ ចម្ការកៅស៊ូនោះ”។
ប្រជាសហគមន៍តំបន់ព្រៃឡង់ខេត្តកំពង់ធំអះអាងថា ឈើមូលនៅក្នុងតំបន់ព្រៃឡង់នៅតែមានគេលួចកាប់ ហើយដឹកជញ្ជូនចូលដីសម្បទានក្រុមហ៊ុនវៀតណាម ស៊ីអរស៊ីខេ (CRCK)។
ចំពោះក្រុមហ៊ុននេះ មិនមានមន្ត្រីអាជ្ញាធរណាផ្ដល់ព័ត៌មានពីអាសយដ្ឋានទំនាក់ទំនងតំណាងក្រុមហ៊ុនស៊ីអរស៊ីខេនេះឡើយ។
អភិបាលរងខេត្តកំពង់ធំ លោក អ៊ុត សំអន បានមានប្រសាសន៍ថា ក្រុមហ៊ុនស៊ីអរស៊ីខេ មិនមានជាប់ទាក់ទិនដូចការចោទរបស់ពលរដ្ឋនោះទេ ពីព្រោះមានក្រុមហ៊ុនផ្សេងមួយទៀតបានទទួលអាជ្ញាប័ណ្ណប្រមូលឈើនៅក្នុងតំបន់ដីសម្បទានរបស់ក្រុមហ៊ុនស៊ីអរស៊ីខេ ៖ “ប្រសិនជាមានក្រៅក្រុមហ៊ុនស៊ីអរស៊ីខេ ខ្ញុំយល់ថា ប្រហែលជាក្រុមហ៊ុនដែលដេញបានព្រៃគប់ សិទ្ធិមួយឆ្នាំម្ដង។ បើក្នុងក្រុមហ៊ុនស៊ីអរស៊ីខេ ជាអ្នកប្រមូលឈើឈរ ប៉ុន្តែអាហ្នឹងខ្ញុំមិនបានតាមដានទេ ពីព្រោះជំនាញគេតាមដានជាង”។
“ឈើមូលរាប់សិបឡាន ពិតជាត្រូវគេកាប់ពីតំបន់ព្រៃឡង់ក្រៅបរិវេណដីសម្បទាន ហើយដឹកចូលរោងចក្រអារឈើក្នុងបរិវេណដីក្រុមហ៊ុនស៊ីអរស៊ីខេ ដោយបំពានច្បាប់ក្នុងមួយយប់ៗ។ លោកបន្តថា ក្រុមអ្នកលូចកាប់ឈើនេះ បានប្ដូររូបភាពឈប់កាប់ឈើគរទុកដូចមុនហើយ គឺឈើត្រូវដឹកជញ្ជូនចូលរោងចក្រអារឈើអស់ បន្ទាប់កាប់រំលំរួច ពីព្រោះខ្លាចក្រុមសហគមន៍រកឃើញគំនរឈើក្នុងព្រៃ ហើយនាំគ្នាដុតចោល ៖ “ជាទូទៅក្នុងមួយយប់ៗ កាប់ឈើមូលចេញពីព្រៃឡង់ដែលជាតំបន់ព្រៃឈើគ្រប់គ្រងដោយរដ្ឋជាប្រភេទដូងថែម និងឈើជ័រចុង ឈើទាល។ កាប់ហើយដឹកឈើហ្នឹងផ្ទាល់ ឈើមូលយកមកអារឈើក្នុងរោងចក្រស៊ីអារស៊ីខេ ហ្នឹង ព្រោះយើងដឹងថា រោងចក្រហ្នឹងមានម៉ាស៊ីនអារឈើធំៗ ចំនួនបួនគ្រឿង”។” យោងតាមសេចក្ដីរាយការណ៍របស់សាក្សីមកកាន់មជ្ឈមណ្ឌលសិទ្ធិមនុស្សកម្ពុជា។
យ៉ាងនេះក្ដី តំណាងសហគមន៍ឲ្យដឹងថា ការកាប់ឈើនៅព្រៃឡង់នោះ មិនមែនមានតែក្រុមហ៊ុនសម្បទានទេ។ ក្រៅពីក្រុមហ៊ុនសម្បទានក៏មានក្រុមហ៊ុនព្រៃគប់ និងក្រុមកាប់ឈើអានាធិបតេយ្យ មានបុគ្គលជាកងកម្លាំង អ្នកមានអំណាច និងប្រជាពលរដ្ឋនៅមូលដ្ឋាននោះទៀតផង។
នៅថ្ងៃអាទិត្យ ទី១ ខែមករា ឆ្នាំ២០១២ ប្រជាពលរដ្ឋសហគមន៍ព្រៃឡង់ នៅស្រុកសណ្ដាន់ ខេត្តកំពង់ធំ
បានអំពាវនាវសុំឲ្យប្រមុខរាជរដ្ឋាភិបាលចាត់វិធានការស៊ើបអង្កេតទៅលើករណីបន្តលូចកាប់ឈើមូលពីក្នុងព្រៃឡង់។
—————————————–
maochamna 
ព្រៃឡង់នឹងត្រូវរលាយ ដោយសារអ្នកគិតតែពីប្រយោជន៍ខ្លួនឯង។ ទៅអនាគតកាល កូនចៅរបស់ពួកគេនឹងមិនអរគុណចំពោះដូនតារបស់ខ្លួនឡើយ ពីព្រោះផលអាក្រក់ដែលគេបានទទួលពីបំរែបំរួលអាកាសធាតុ គឺធំធេងជាងផលចំនេញពីព្រៃមួយក្តាប់តូចនេះទៅទៀត។